1950ean NBEren Idazkaritza Nagusiak Errefuxiatuentzako Goi Komisariatua sortu zuen, agentzia “erabat apolitikoa”, Europan zehar noraezean zebiltzan milioi bat inguru gerra errefuxiaturi laguntzeko helburuz. Gaur egun, 22 miliotik gora pertsonari laguntzen dio agentziak, errefuxiatu, lekualdatu, aberrigabe, iheslari eta etxeratuen artean. Horietatik, gehientsuenak emakume eta haurrak dira. 120 herrialdetan ditu bulegoak, eta langileen %80k bertatik bertara egiten du lan baldintza gogor eta arriskutsuetan. Larrialdiko laguntza humanitarioa ere eskeintzen du.

Bere aldetik, ACNUR Euskal Batzordea 1998ean sortu zen. Irabazi asmorik gabeko elkartea da eta beronen helburu eta euskarria euskal gizartean errefuxiatuen egoera lazgarriaz berri ematea da. Era berean, ACNURen proiektuak diruz laguntzeko diru bilketak egiten ditu. ERREFUXIATUAK aldizkaria ere, 2004 urteaz geroztik Batzordeak bereganatu eta editatzen du.